Parores de salüt dl Assessëura per la scola tudëscia Dut.ra Sabina Kasslatter Mur
La segonda fiera dla furmazion "Futurum 2009" nfurmea y urientea n cont dla ufierta rica de istituzions y carieres de furmazion, dala scolina nchin al'Università, y n cont dla pusciblteies defrëntes de istruzion y furmazion per persones adultes te nosta provinzia.
La furmazion, l savëi, la cunescënzes te uni sort de ciamps y l pensé a na maniera criativa arà tl daunì na for majera mpurtanza per l svilup persunel y prufesciunel dla populazion de Südtirol, ma nce per l svilup economich de nosta provinzia. De chësta cunvinzion ie nce l tuadëur dl daunì tudësch Matthias Horx, prufessëur che à rujenà ai prims de dezëmber n ucajion de n cunvëni sun la pusciblteies dl daunì dla "Europaregion Tirol" tl 2020.Do che la prima edizion dla fiera dla furmazion fova fineda via do cater dis de nuvëmber dl 2007, se àn rendù cont che la partezipazion di/dla vijitadëures fova stata scialdi majera de chël che n se ova nmaginà y aspità. Per duc chëi che à tëut pert ie chësc stat n sëni che la jënt de Südtirol ne se nteressea nia mé dla pusciblteies de furmazion defrëntes, ma che la à propi nce legrëza a mparé.
Daviadechël sons segura che nce la segonda fiera dla furmazion unirà tëuta su cun plajëi y nteres dala populazion de Südtirol.
Dut.ra Sabina Kasslatter Mur
Assessuria por l’istruziun y la cultura todëscia