Furmazion y pruspetives de lëur va var a var. N ucajion dla fiera dla furmazion Futurum 2009 pieta la Repartizion provinziela Lëur nfurmazions n cont dla tendënzes de ocupazion sun l marcià dl lëur tla Provinzia de Bulsan, n cont dla pruspetives de lëur ti setores defrënc y dl lernerat. La persones nteressedes puderà oradechël nriescer nuviteies sun lëures da d'instà, practicums de furmazion prufesciunela y de urientamënt, cundizions de vitra y de lëur te paejes oradecà, la ntegrazion tl lëur de persones cun handicap, la defendura tecnica y soziela dl lëur - cun referimënt particuler al lëur di jëuni -, la crissa y la dumanda de lëur.
La/i culaboradëures dla Repartizion sarà a despusizion de duc i vijitadëures y de duta la vijitadëures dla fiera per ti judé cun cunsëies y nfurmazions de utl per se deriejer sun l marcià dl lëur tla provinzia y oradecà.

Ôste frecuentè l’université o n istitut superiur do la scora alta? Tla Talia, tl’Austria o te n ater stat foradecà? O stüdieste bele? Informëiete adora assà sön le stüde!
Chilò ciàfeste les inFormazions che t’adores sön i contribuć che la Provinzia Autonoma de Balsan ti dà ai studënć y ales studëntes por sostignì finanziarmënter so stüde: stipendiums, retüda dles tasses universitares, retüda dles spëises de iade, stipendiums y premies por mirić particolars, stipendiums por la Formazion postuniversitara, sciöche inće contribuć por tó pert a cursc de lingaz. Chilò ciàfeste inće inFormazions sura les menses y les ćiases di studënć convenzionades.
Por che al ne sozedes nia valch che te ne t’aspetâs nia do avëi stlüt jö le stüde, te dunse inće dötes les inFormazions importantes sön l’istruziun universitara y sües reformes, le reconescimënt di titui de stüde arjunć foradecà, la mobilité academica y profescionala tl’Uniun Europeica y la strotöra dl stüde por insigné.
Les colaboradësses dl ofize por la promoziun dl stüde, l’université y l’inrescida scientifica y por l’inFormazion universitara de Südtirol ti respognarà ion a dötes tües domandes.

L’evaluazion de duta la scoles che ie tla Provinzia de Bulsan vën fata coche evaluazion nterna y esterna, aldò dla lege provinziela sun “l’Autonomia dla scoles” nr. 12 dl 29 de juni 2000, art. 16 y 17. 
N possa fé n ressumé di cuntenuc de chisc articuli:

• renfurzé l’autonomia de duta la scoles
• purté inant l’efiziënza dl model de scola
• miuré l’ufierta furmativa

Cun l’evaluazion da dedora se an tëut dant de stlarì i ubietifs per arjonjer na bona cualità de duta la scoles che ie tla provinzia de Bulsan tenian cont dla pruzedura y di resultac dl’evaluazion da dedite.
Ntan la mostra dla furmazion “FUTURUM 2009” prejënta i trëi Servijes per l’evaluazion da dedora dla scoles ladines, tudësces y talianes si ativiteies y si publicazions.

La Formazion é dër importanta! Le dërt de studié é un di dërć plü importanć por les mitans y i mituns, y por les scolares y i scolars.
Acioche al ti vëgnes garantì a düć les mius condiziuns sön so tru de Formazion sostëgn l’ofize por l’assistënza scolastica dassënn les families tres aiüć direć y indireć: bel anfat sce ara se trata de stipendiums por scolares y scolars dla scora dl’oblianza, alta o profescionala, de contribuć por i libri de scora o la mensa scolastica, de spëises por le trasport di scolars y dles scolares o por l’assiguraziun cuntra inzidënć, o de contribuć por i istituć d’educaziun o por le sorvisc d’assistënza domisdé o d’isté.
Le fin é chël de superè les dificoltês economiches y soziales tres chisc aiüć finanziars. La Provinzia de Balsan mët a desposiziun chëstes mosöres de sostëgn por ti garantì a dötes les scolares y a düć i scolars les medemes oportunitês por ti ester manëcia a so percurs de Formazion.
Ti ultimi agn él gnü slarié fora les prestaziuns finanziares y materiales, inće te chësc ćiamp é Südtirol straordinar. Chi che investësc tla Formazion investësc tl dagnì, chël sal Südtirol.
En bona colaboraziun cun le Grup de laûr por i convić de Südtirol (ASH) y l'Ofize Trasport de porsones.

Pro nosta mësa de inFormazion tla mediateca pro la fiera dla Formazion Futurum 2009 ëise la poscibilité da consulté na racoiüda rica de material informatif che reverda i percursc scolastics y universitars y le laûr. I ùn metü sö na "isola de inFormazion", olache i ves pitun la poscibilité:

1. da baié cun n consulënt/na consulënta de orientamënt;
2. da consulté la documentaziun sön la tematica dl laûr, les poscibilitês de Formazion scolastica, universitara y profescionala te nosta provinzia, sön le teritore nazional y foradecà;
3. nos Ves mostrun sciöche an chir inFormazions sön la Formazion y le laûr tres nosta banca dać te internet.
4. danmisdé gnaràl tignì discusciuns por diplomà dles scores altes sön chëstes tematiches:
   • studié tla Talia
   • studié tl Austria y ti Paîsc Todësc
   • mët man n laûr

Jogn, geniturs y adulć ciafa debann nostes publicaziuns che reverda la Formazion, le laûr y l’orientamënt. Implü ves darà i consulënć/les consulëntes consëis sön co y olâ fà i pröms vari tla direziun de osc percurs scolastich, universitar y profescional.

Orëise mëte a jì val? Orëise svilupé ostes idees y laurè por le dagnì?
Öna na poscibilité de se realisé tl monn dl laûr é chël de mëte sö na aziënda. Ester le patrun de se instës à sü vantaji, mo laprò âldel inće de gran sfidades. La Ćiamena dl comerz rapresentëia i interesc dl’economia de Südtirol y é le pröm punt de referimënt dles aziëndes dl post. Ara ti pîta ai impresars y ales impresaries (y a chi che oress le deventè) sorvisc dër importanć, sciöche p.ej. tl ćiamp dla fondaziun dl’aziënda, dl svilup de produć nüs, dl esport y dla surandada dl’aziënda.
En gaujiun dla Fiera dla Formazion “Futurum 2009” ves informëia l’IRE-WIFO (Istitut por l’inrescida economica) dla Ćiamena dl comerz de Balsan sön les fases desvalies dl’aziënda.

I vijitadus dla mediateca po s’informè sön les ativitês de promoziun y de sostëgn dles inovaziuns didatiches y sön la strotöra dles Intendënzes scolastiches y di Istituć pedagogics provinziai di trëi grups linguistics y sön la sfilza de cursc de Formazion profescionala sciöch’inće sön i proieć y pratica dles repartiziuns 21 y 22.
Por i interessà vëgnel pité revistes, publicaziuns y material che documentëia l’ativité d’inrescida y de sostëgn dles scores de Südtirol.
Vigni dé él esperć/tes dl setur che presentëia proieć didatics y metodologics importanć, ativitês de sperimentaziun tl’inrescida y te scora sciöche inće ejëmpli dl’inovaziun pedagogica y didatica.
Al gnarà inće splighé les prozedöres nöies d’abilitaziun y d’assunziun por chi che ó laorè sciöche insegnant/a.
Tl ćiamp dla Formazion profescionala vëgnel presentè y mostrè proieć che reverda scores de deplü gra y modei didatics nüs por la promoziun di jogn cun talënć desvalis, sciöch’inće mosöres por i arjigné ca al monn dl laûr.